32-qurbon: Toshkentda koronavirusga chalingan 71 yoshli onaxon vafot etdi
Toshkent shahri Shayxontohur tumanida yashovchi 71 yoshli onaxon M.G. 30-iyun kuni koronavirus aniqlanganligi sababli Epidemiologiya, mikrobiologiya va yuqumli kasalliklar ilmiy-tekshirish instituti klinikasining reanimatsiya bo‘limiga yotqizilgan.
Sog‘liqni saqlash vazirligi tomonidan 5-iyul kuni tarqatilgan xabarga ko‘ra, unga “Yurak ishemik kasalligi, gipertoniya, stenokardiya, qandli diabet, surunkali buyrak yetishmovchiligi, ikki tomonlama pnevmoniya og‘ir kechishi, o‘tkir nafas yetishmovchiligi” tashxisi qo‘yilgan.
Bemor bundan avval so‘nggi 10 yil davomida yurak ishemik kasalligi, gipertoniya, stenokardiya, qandli diabet, surunkali buyrak yetishmovchiligi tashxisi bilan davolanib yurgan. So‘nggi bir oy ichida esa rejali gemodializ muolajalarini olishni boshlagan.
Qayd etishlaricha, bemorning davolanishi davomida kunlik ahvoli malakali shifokorlar tomonidan maslahatlar, Respublika shoshilinch tibbiy yordam ilmiy markazi mutaxassislari tomonidan telemeditsina orqali konsiliumlar o‘tkazilib, doimiy nazoratga olingan.
“Biroq shifokorlarning standartlar asosida o‘tkazgan tezkor reanimatsion muolajalariga qaramasdan bemor o‘tkir yurak-qon tomir va o‘pka yetishmovchiligidan vafot etdi”, — deyiladi vazirlik axborotida. Bemor aynan qachon vafot etganligiga Sog‘liqni saqlash vazirligi axborotida aniqlik kiritilmagan. U koronavirusning O‘zbekistondagi 32-qurboni bo‘ldi.
Eslatib o‘tamiz, 5-iyul soat 10:00 holatiga ko‘ra O‘zbekistonda koronavirus infeksiyasini yuqtirib olish bilan bog‘liq jami 9829 ta holat aniqlangan, shundan 6425 ta holatda bemorlar sog‘aygan.
